Biblia/Amos

←Joel

Biblia Amos

Abdias→

Itzulpena: Elizen Arteko Biblia taldea

1. atala

¹ Hona hemen Tekoa hiriko Amos artzainaren hitzak, Jaunak Israeli buruz agertu zizkionak, lurrikara baino bi urte lehenago, Judako errege Uzias zela, eta Israelgoa, berriz, Joaxen seme Jeroboam. ² Hau zioen Amosek:

Orroa dagi Jaunak Siondik, deiadar Jerusalemdik; larreak galduak dira, Karmel gaina lehortua.

³ Honela dio Jaunak: «Damasko herriak gaiztakeriarik asko egin du, zein baino zein handiago. Eta beraz, zigortu egingo dut! Galaad erabat txikitu baitute, burdin arez bezala; ⁴ horregatik, su emango diot Hazael errege-etxeari, eta suak irentsiko ditu Ben-Hadaden jauregiak. ⁵ Zatitu egingo ditut Damaskoko hiri-morroiloak, kendu Bikat-Abendik buruzagia, kendu Bet-Edendik aginte-makila duena, eta Siriako herria Kir-era erbesteratua izango da». Jaunak esan du.

Filistea

⁶ Honela dio Jaunak: «Gaza herriak gaiztakeriarik asko egin du, zein baino zein handiago. Eta beraz, zigortu egingo dut! Herri osoak erbesteratu baititu, edomdarren esku uzteko; ⁷ horregatik, su emango diet Gazako harresiei, eta bertako jauregiak irentsi egingo ditu. ⁸ Axdod hiritik kendu egingo dut buruzagia, Axkelondik aginte-makila duena; Ekron hiriaren aurka jasoko dut eskua, eta gainerako filistear apurrak galdu egingo dira». Jainko Jaunak esan du.

Tiro

⁹ Honela dio Jaunak: «Tiro herriak gaiztakeriarik asko egin du, zein baino zein handiago. Eta beraz, zigortu egingo dut! Jendetzak eman baitizkie gatibu edomdarrei, anaiarteko itun-hitzari eutsi gabe; ¹⁰ horregatik, su emango diet Tiroko harresiei, eta bertako jauregiak irentsi egingo ditu».

Edom

¹¹ Honela dio Jaunak: «Edom herriak gaiztakeriarik asko egin du, zein baino zein handiago. Eta beraz, zigortu egingo dut! Ezpataz aurrean erabili baititu bere anaia israeldarrak, errukia itoz; gogor eutsi dio suminari, eten gabe gorrotoari; ¹² horregatik, su emango diot Teman hiriari, eta Botzra hiriko jauregiak irentsi egingo ditu».

Amon

¹³ Honela dio Jaunak: «Amondarrek gaiztakeriarik asko egin dute, zein baino zein handiago. Eta beraz, zigortu egingo ditut! Galaadeko emakume haurdunei sabela urratu baitzieten, beren lurraldea zabaldu ahal izateko; ¹⁴ horregatik, su emango diet Raba hiriko harresiei, eta bertako jauregiak irentsi egingo ditu; borrokaldikoan, gudu-garrasiak izango dira eta ekaitz-egunean bezalako zalaparta. ¹⁵ Haien erregeak erbestera joan beharko du bere buruzagi eta guzti». Jaunak esan du.

Moab

2. atala

¹ Honela dio Jaunak: «Moab herriak gaiztakeriarik asko egin du, zein baino zein handiago. Eta beraz, zigortu egingo dut! Edomgo erregearen hezurrak profanatu baitzituzten, erraustu eta kare bihurtu; ² horregatik, su emango diot Moab lurraldeari, eta Keriot hiriko jauregiak irentsi egingo ditu; gudu-garrasi eta adar-hots artean hilko dira moabdarrak; ³ berauen mugetatik kendu egingo dut agintaria, eta buruzagi guztiak harekin batera hilko». Jaunak esan du.

Juda

⁴ Honela dio Jaunak: «Juda herriak gaiztakeriarik asko egin du, zein baino zein handiago. Eta beraz, zigortu egingo dut! Jaunak irakatsia gutxietsi baitute, eta haren aginduak bete ez; gurasoen sineskeria berberek desbideratu dituzte judatarrak; ⁵ horregatik, su emango diot Juda lurraldeari, eta Jerusalemgo jauregiak irentsi egingo ditu».

Israel

⁶ Honela dio Jaunak: «Israel herriak gaiztakeriarik asko egin du, zein baino zein handiago. Eta beraz, zigortu egingo dut! Gizon zuzena dirutan saltzen baitute eta behartsua oinetako pare baten truke; ⁷ jende xehea lurreko hautsaren kontra zapaltzen dute, eta jende errukarriaren eskubidea baztertzen. Aita-semeak neska bat berarekin dabiltza, nire izen santua laidotuz. ⁸ Behartsuei bahitutako soineko gainean etzaten dira edozein kultu-lekutan, eta bidegabekeriaz bildutako ardoa edaten dute beren Jainkoaren etxean. ⁹ Alabaina, ene herri hori, zuri bidea zabaltzeko nik suntsitu nuen amortarra, zedroa bezain tantai eta artea bezain sendo zena; bota nizkion fruituak gainetik, eta atera sustraiak azpitik. ¹⁰ Nik igoarazi zintuztedan Egiptotik, eta basamortuan zehar berrogei urtez gidatu, amortarren lurraldeaz jabe zintezten. ¹¹ Profetak sortarazi nituen zuen seme-alaben artetik, eta nazireuak zuen gazteen artetik. Ez al da hala, israeldarrok? Nik, Jaunak, galdegiten dizuet. ¹² Baina zuek nazireuei ardoa edanarazi diezue, eta profetei nire mezua ez zabaltzeko agindu. ¹³ Orain, bada, nik zapalduko zaituztet, gari-balaz bete-bete eginiko gurdiak lurra zapaltzen duen bezala. ¹⁴ Bizkorrenak ere ezin izango du ihes egin, indartsuena ezin izango da bere indarraz baliatu, oldartsua ez da bizirik aterako. ¹⁵ Arkulariak ez dio bere buruari eutsiko, oinezkoa ez da bizirik aterako, ez eta zaldizkoa ere. ¹⁶ Egun hartan, gudari lehiatuenak ere bertan behera utziko ditu armak ihes egin ahal izateko». Jaunak esan du.

3. atala

¹ Entzun, Israelgo seme-alabok. Hona Jaunak zuen aurka, Egiptotik igoarazi zuen familia horren guztiaren aurka, adierazten duen mezua:

² «Zuek bakarrik hautatu zaituztet lurreko familia guztien artetik; horregatik, bada, zuen bekatu guztien kontua eskatuko dizuet».

Profetagintza

³ Bi gizon elkarrekin joango ote dira, lehenik ados jarri ez badira? ⁴ Lehoiak oihanean orroarik egiten ote du, harrapakinik ez badu? Lehoikumeak gordelekutik marruma egiten ote du, ezer harrapatu ez badu? ⁵ Txoririk erortzen ote da lurrean jarritako sarean, zer janik ez badu? Sarea lurretik gora teinkatzen ote da, ezer harrapatu ez badu? ⁶ Jo al daiteke hirian adarra, jendea asaldatu gabe? Gerta al daiteke hirian zorigaitza, Jaunak eragin gabe? ⁷ Ez, Jainko Jaunak ez du ezer egiten, bere zerbitzari profetei bere asmoa azaldu gabe. ⁸ Lehoiak orroa dagi, nor ez beldurtu? Jaunak hitz dagi, nork ez haren mezua zabaldu?

Jaunak Samaria zigortuko

⁹ Aldarrikatu Axdodeko jauregietan bizi direnei, Egiptoko jauregietakoei: «Bil zaitezte Samaria inguruko mendietan, eta ikusi hango nahaskeria ugariak, zapalkuntza handiak». ¹⁰ Honela dio Jainko Jaunak: «Ez dute zuzentasunaren senik. Beren jauregiak indarkeriaz lapurtutako ondasunez betetzen dituzte. ¹¹ Horregatik, bada, etsaiak inguratuko du lurraldea, zure babeslekuak lurreratuko ditu, eta zure jauregiak hustuko». ¹² Honela dio Jaunak: «Artzainak lehoiaren ahotik bi hanka edo belarri-zati bat besterik askatzen ez duen bezala, Israelgo seme-alaben artetik ere, Samarian ohe dotoreetan etzanik lasai bizi direnen artetik, banaka batzuk besterik ez dira salbatuko». ¹³ Honela dio Jainko Jaun ahalguztidunak: «Entzun eta izan lekuko Jakoben ondorengoen aurka. ¹⁴ Israeli bere gaiztakerien kontua eska diezaiodan egunean, Betelgo aldarearen kontra ekingo diot: ertzak apurtuko dizkiot eta lurrera botako. ¹⁵ Desegingo ditut udako etxea eta negukoa. Marfilez jantzitako etxeak desagertuko dira, eta jauregi bikainak ezereztuko». Jaunak esan du.

4. atala

¹ Entzun hitz hau, Samariako andreok, Baxango behiak bezain guri zaretenok: jende xehea zapaltzen duzue, behartsuak bidegabeki erabiltzen; «Ekarri ardoa, edan dezagun» agintzen diezue senarrei. ² Zin hau egin du Jaunak bere santutasunagatik: «Badatoz egunak, arrainak amuz bezala, gakoan loturik eramango zaituztenekoak; eraman, bai eta gelditutako bakarrak ere. ³ Harresi-zuloetatik irtengo zarete, bakoitzak bere aurrean izango duenetik, eta iparralderantz jaurtikiko zaituztete».

«Ez zarete niregana itzuli»

⁴ Honela dio Jainko Jaunak: «Zoazte Betelgo santutegira nire kontra errebelatzeko, eta Gilgalera zuen errebeldiak ugaritzeko; eskaini goizero zeuen sakrifizioak, eta hiru egunero hamarrenak; ⁵ eskaini legamidun ogia esker onezko oparitzat; aldarrikatu zeuen borondatezko eskaintzak, horixe baituzue atsegin, Israelgo seme-alabok».

⁶ Honela dio Jaunak: «Gosea bidali dizuet hiri guztietara, ogi falta zeuen bizilekuetara. Hala ere, ez zarete niregana itzuli. Nik, Jaunak, esana.

⁷ «Euria ukatu dizuet uzta-aroa baino hiru hilabete lehenagotik ere; hiri batean euria eginarazi dut eta bestean ez; etxalde batek euria hartu du, eta bestea, euririk ezean, lehortu egin da. ⁸ Jendea badoa herriz herri ur bila, baina ez du behar adina aurkitzen. Hala ere, ez zarete niregana itzuli. Nik, Jaunak, esana.

⁹ «Haize erreaz eta gorrinaz jo ditut zuen baratzea eta mahastiak; pikuondo eta olibondoak matxinsaltoak jan ditu. Hala ere, ez zarete niregana itzuli. Nik, Jaunak, esana.

¹⁰ «Izurria bidali dut zuengana Egiptokoaren antzekoa. Zuen gazteak ezpataz hilarazi ditut, eta zuen zaldiak etsaien esku utzi. Zuen sudurretaraino igoarazi dut hildakoen kiratsa, gudu-kanpalekuetan. Hala ere, ez zarete niregana itzuli. Nik, Jaunak, esana.

¹¹ «Irauli egin zaituztet, Sodoma eta Gomorra irauli nituen bezala; sutatik ateratako ilintiaren antzera libratu zarete. Hala ere, ez zarete niregana itzuli, Nik, Jaunak, esana.

¹² «Horregatik, bada, zu zigortzera nator, Israel; eta zigortzera natorkizunez gero, presta zaitez zeure Jainkoaren aurrean agertzeko».

¹³ Jainkoa da mendiak eratu dituena, eta haizea sortu duena, gizakiari bere burubideak agertzen dizkiona, ilunpea egunsenti bihurtzen duena, mundu guztiaren gainetik dagoena. Jauna du izena, Jainko ahalguztiduna.

Negar-kanta

5. atala

¹ Entzun, Israel herri, zuregatik abesten dudan negar-kanta hau: ² Israel neskatxa ederra erori da, ez da gehiago jaikiko; lur jota dago, ez da altxatuko duenik. ³ Honela diotso Jainko Jaunak Israel herriari: «Gerrara mila gizon bidaltzen dituen hiriari ehun itzuliko zaizkio; ehun bidaltzen dituenari, hamar».

Deia: «Etorri nire bila, bizi zaitezten»

⁴ Honela diotso Jaunak Israel herriari: «Etorri nire bila, bizi zaitezten. ⁵ Baina ez ibili nire bila Betelen, ez joan Gilgalera, ez jo Beer-Xebarantz; Gilgal erbestean galduko baita, Betel ezereztu». ⁶ Ibili Jaunaren bila, bizi zaitezten. Bestela, Joseren ondorengoen gainera oldartuko da, itzalezineko suz irentsiko du Betel. ⁷ Ai! Justizia samindura bihurtzen dute, eta zuzenbidea hankapean erabiltzen.

⁸ Jainkoa da izar-multzoak sortu dituena, iluna egunsenti eta eguna gau beltz bihurtzen duena; itsas urak biltzen eta lur gainera isurtzen dituena. Jauna du izena. ⁹ Berak xehatzen du indartsua, berak hondatzen gotorlekuak.

¹⁰ Auzitegietan salatzen zaituztena gorrotatzen duzue, eta egia dioena gaitzesten. ¹¹ Jende xehea larrutzen duzue gari-zerga ordaintzera behartuz. Harlanduzko etxeak egin dituzue, baina ez zarete berorietan biziko; mahasti bikainak landatu, baina ez duzue berorien ardorik edango. ¹² Ondo ezaguna dut zuen errebeldien neurrigabea eta zuen bekatuen astuna: errugabea estutu duzue, eskupekoa jaso, auzitegian behartsuen eskubidea baztertu. ¹³ Hori dela eta, zuhurrak nahiago du isildu gaiztoaldi honetan. ¹⁴ Bilatu ongia, ez gaizkia, bizi zaitezten. Orduan bai, zuekin izango da Jauna, Jainko ahalguztiduna, berak esan bezala. ¹⁵ Gorrota ezazue gaizkia, maita ongia, egin zuzentasuna auzitegietan, ea Jainko Jaun ahalguztiduna Joseren azken ondorengoekin gupidatzen den.

¹⁶ Honela dio Jainko Jaun ahalguztidunak: «Plaza guztietan doluminak izango dira, kale guztietan negar-zotinak. Nekazariak deituko dituzte dolurako, erostariak hileta-negarrerako; ¹⁷ mahasti guztietan doluminak izango dira, ni zu zigortzera etortzean». Jaunak esan du.

Jaunaren eguna

¹⁸ Ai Jaunaren egunaren irrikatan zaudetenok! Zer izango dela uste duzue zuentzat Jaunaren egun hori? Egun beltza izango duzue, eta ez egun argia. ¹⁹ Egun horretan, lehoiagandik ihesi ibili eta hartzarekin tupust egiten duen gizonaren antzeko izango zarete, edota, etxean sartu eta horman eskua ipini orduko, sugeak zizta egiten dionaren antzeko. ²⁰ Bai, Jaunaren eguna egun beltza izango da, eta ez egun argia, argi-izpirik gabeko ilun beltza!

Sasikultuaren aurka

²¹ Honela dio Jaunak: «Gorroto eta higuin ditut zuen jaiak, ez ditut atsegin zuen kultu-batzarrak. ²² Aldare gainera ekartzen dizkidazuen erre-opariak eta eskain-opariak ez ditut atsegin, eta zekor gizenen elkartasun-opariei bizkarra ematen diet. ²³ Kendu nire ondotik zure kantuen zarata-hotsa, zure zitara-soinurik ez dut entzun nahi. ²⁴ Datorrela, bai, zuzenbidea ura bezala datorrela justizia, beti darion erreka bezala.

²⁵ «Israel herri, basamortuan berrogei urtez ez zenidan sakrifiziorik, ez eskain-oparirik egin. ²⁶ Baina orain, Sikut zuen jainko-erregearen eta Kiion zuen jainko-izarraren irudiak egin dituzuenez, ²⁷ zeuekin eramango dituzue, Damaskotik harantz atzerrira bidaliko zaituztedanean».

Jainko Jaun ahalguztiduna, hori du izena.

6. atala

¹ Ai zuek, uste osoa Sionen duzuenok, eta Samarian lasai bizi zaretenok! Ai zuek, nazio artean buru omen den Israelgo handikiok, nortzurengana baitatoz israeldar guztiak! ² Zoazte Kalne hirira eta begira, hurbil zaitezte handik Hamat handira, eta jaitsi hortik Filisteako Gat-era. Erresuma horiek baino hobea ote da zuena? Zuen lurraldea horiena baino zabalagoa ote? ³ Zorigaitzaren eguna uxatu nahi, eta indarkeriaren nagusigoa dakarzue. ⁴ Ohe dotore eta goxotan luze etzaten zarete, artaldeko bildots eta ikuiluko txahal onenak jaten dituzue. ⁵ Harparen soinura kantuan egiten duzue, doinu berriak asmatuz, David zaretelakoan; ⁶ ardoa kopa handitan edaten duzue, olio usaintsu onenez igurtzitzen zarete. Eta ez zaizue axola Israel herriaren hondamendia! ⁷ Horregatik, bada, zuek izango zarete lehenengo erbesteratuak, eta hor amaituko dira zuen jan-edan eta nasaikeriak. ⁸ Honela dio Jainko Jaun ahalguztidunak,

bere biziarengatik zin eginez: «Gaitzesten dut Jakoben ondorengoen harrokeria eta haien jauregiak gorrotatzen ditut: etsaiaren esku utziko dut osorik hiriburua».

⁹ Demagun etxe batean hamar lagun gelditzen direla: hamarrak hilko dira. ¹⁰ Honela galdetuko dio ahaideak etxe barrunbehean dagoenari, gorpuak erretzen dituenarekin hilotzak etxetik ateratzera datorrenean: «Ba al da besterik zurekin?» Eta hark erantzungo: «Ez». Eta erantsiko: «Ixo! Ez da Jaunaren izena aipatzeko momentua!»

¹¹ Jaunak agindu eta etxe handia nahiz txikia behera datoz, hondakin bihurtuz.

¹² Egin ote lezakete lauoinka haitzetan zaldiek? Golda ote lezakete itsasoa idiek? Zuek, ordea, zuzenbidea pozoi bihurtu duzue, justizia samindura. ¹³ Lo-Dabar-ez jabetu zaretela eta, pozik zaudete. Honela diozue: «Ez dugu, bada, geure indar handiaz eskuratu Karnaim?» ¹⁴ Hona, bada, Israel herri, zer dioen Jainko Jaun ahalguztidunak: «Nik altxaraziko dut herri bat zure aurka, eta honek zapalduko zaitu, hasi goiko Hamat ertzetik eta beheko Araba errekaraino».

7. atala

¹ Hona zer erakutsi zidan Jainko Jaunak: bibelarra, errege-abereei dagokien bibelarra, hazten ari zela, matxinsaltoak sortu zituen berak. ² Matxinsaltoek lurraldeko belar guztia garbitu zutenean, esan nuen:
-Ene Jainko Jauna, barkatu, arren! Nola eutsiko dio, bada, Israel herriak bere biziari, hain txikia izanik? ³ Errukitu zen Jauna, eta esan zuen:
-Ez da horrelakorik gertatuko!

Bigarren ikuskaria: suaren zigorra

⁴ Beste hau ere erakutsi zidan Jainko Jaunak: bere herria suaz zigortzera zetorren bera, eta suak lurpeko itsaso handia eta Israel, Jainkoaren ondarea, irentsi behar zituen. ⁵ Nik esan nuen:
-Ene Jainko Jauna, zaude geldi! Nola eutsiko dio, bada, Israel herriak bere biziari, hain txikia izanik? ⁶ Errukitu zen Jainko Jauna, eta esan zuen:
-Hau ere ez da gertatuko!

Hirugarren ikuskaria: berun-haria

⁷ Beste hau ere erakutsi zidan Jaunak: horma baten ondoan zegoen bera, eskuan berun-haria zuela. ⁸ Jaunak galdetu zidan:
-Zer ikusten duzu, Amos?
-Berun-haria
-erantzun nion. Eta Jaunak:
-Horra, berun-hari honetaz, neure herria zuzen ote dabilen ikusi nahi dut. Ez baitut gehiago ezikusiarenik egingo.

⁹ «Isaaken ondorengoen kultu-lekuak soilduak izango dira, Israelen santutegiak deseginak. Jeroboamen errege-etxearen aurka ezpata jasoko dut».

¹⁰ Betelgo apaiz Amatziasek berri hau igorri zion Israelgo errege Jeroboami: «Hemen, israeldarren artean, Amos azpilanean ari zaizu. Herriak ezin du gehiago jasan haren esanik.

¹¹ «Honela ari baita:

<Jeroboam ezpataz hilko da, eta Israel herria erbestera eramango dute, bere lurraldetik urrun»>.

¹² Orduan, Amatziasek Amosi esan zion:
-Ikusle, zoaz, alde hemendik Juda lurraldera. Egin han profetarena eta irabazi han zeure ogia. ¹³ Baina Betelen ez ari gehiago profetagintzan, hau errege-santutegi baita eta erreinuko jauretxe.

¹⁴ Amosek erantzun zion:
-Ni ez naiz profeta, ez eta profeta-taldekidea. Abeltzaina naiz eta basapiku-biltzailea. ¹⁵ Baina Jaunak artzain nenbilelarik hartu ninduen eta bere herri Israeli bere mezua hots egitera bidali. ¹⁶ Orain, bada, entzun Jaunaren hitza. Zuk diozu, ez dezadala Jaunaren mezua Israelen kontra hots egin, ez nadila mintza Isaaken ondorengoen aurka. ¹⁷ Hala ere, hona zer dioen Jaunak:

«Zure andrea emagaldu bihurtuko da hirian, zure seme-alabak ezpatapean hilko dira, zure lurraldea banatua izango da, zu zeu atzerrian hilko zara eta Israel herria erbestera eramango dute, bere lurraldetik urrun».

Laugarren ikuskaria: fruitu-saskia

8. atala

¹ Beste hau ere erakutsi zidan Jainko Jaunak: saskia bete fruitu heldu. ²
-Zer ikusten duzu, Amos?
-galdetu zidan.
-Saskia bete fruitu heldu
-erantzun nion. Jaunak esan zidan:
-Bai, heldua da amaiera nire herri Israelentzat. Ez dut gehiago ezikusiarenik egingo.

³ Honela dio Jaunak: «Egun hartan, jauregiko kantuak intziri bihurtuko dira, hilotzak izango dira nonahi, eta isilean kanpora jaurtikiko dituzte».

Badator zigor-eguna

⁴ Entzun hau, zuek, behartsuak zapaldu eta jende errukarria hondatzen duzuenok. ⁵ Zuen baitan diozue: «Noiz amaitu behar ote du ilberri-jaiak, laborea saltzeko? Noiz larunbatak, garia salmentan ateratzeko? Neurria txikiagotu eta prezioak handituko ditugu, okerreko pisuak erabiliz. ⁶ Gari-hautsa bera ere saldu egingo dugu. Jende xehea dirutan erosiko dugu, eta behartsuak oinetako pare baten truke».

⁷ Jakoben ondorengoen ohorea den Jaunak zin dagi, ez dituela ahaztuko berorien egintza gaiztoak. ⁸ Horrekin guztiarekin, lurra bera ere ez ote da dardaratuko? Bizilagunek ez ote dute dolurik egingo? Lur osoa, Nilo ibaia bezala haziko da, Egiptoko ibaiaren antzera puztu eta hustuko da.

⁹ Honela dio Jaunak: «Egun hartan, eguerdi betean sarraraziko dut eguzkia, eta egun-argitan ilunduko dut lurra. ¹⁰ Zuen jaiak dolu bihurtuko ditut, zuen abestiak negar-kantu; dolu-jantziz estaliko zaituztet, eta zuen buruak soilduko ditut. Seme bakarraren heriotzakoan bezain gogorra egingo dut zuen samina. Honen guztiaren amaiera benetan garratza izango da». ¹¹ Honela dio Jainko Jaunak: «Hara, badatoz egunak: lurrera gosea bidaliko dut; ez ogi-gosea, eta ez ur-egarria, Jaunaren hitza entzuteko gose-egarria baizik. ¹² Nora-ezean ibiliko dira, itsasoz itsaso, iparraldetik eguzkialdera, Jaunaren hitzaren bila, baina ez dute aurkituko. ¹³ Egun hartan, neska gazte politak eta mutil bikainak ere ahuleziak joko ditu egarriaren egarriz. ¹⁴ Samariako sasijainkoen izenean zin egiten dutenak, <Gora zure jainkoa, Dan!, Gora Beer-Xebako ahaltsua!> esanez, erori egingo dira, berriro ez jaikitzeko».

Bosgarren ikuskaria: Israelgo erresumaren azkena

9. atala

¹ Jauna ikusi nuen aldare ondoan, zioela: «Jo zutabe-buruak eta atari osoa dardaratuko da; txikitu eta eroraraz itzazu guztien buruen gainera; gelditzen direnak ezpataz garbituko ditut; ez du inork ihes egingo, ez da inor bizirik aterako. ² Hilen Egoitzako barrunbehetan sartu arren, handik ere aterako ditu nire eskuak; zerugoietara igo arren, handik ere jaitsaraziko ditut; ³ Karmel mendi gainean gorde arren, han ere aurkitu eta harrapatuko ditut; nire bistatik itsas putzuan barrena galdu arren, han ere itsas sugeak zizta ditzan egingo dut; ⁴ beren burua etsaien esku gatibu utzi arren, han ere ezpataz hilaraziko ditut. Begi-bistan izango ditut, ez onerako, bai kalterako».

⁵ Jainko Jaun ahalguztidunak lurra jo eta lurrak dardara, bizilagun guztiek dolu; Egiptoko Nilo ibaiaren antzera lur guztia puztu eta hustu; ⁶ zeru-sabaia lurrean oinarritzen du, eta horren gainean eraikitzen bere jauregia; itsas urak bildu eta lur gainera isurtzen ditu. Jauna du izena.

⁷ Honela dio Jaunak: «Israeldarrok, niretzat ez dago alderik zuen eta etiopiarren artean. Ez al nituen nik filistearrak Kretatik eta siriarrak Kir-tik atera, israeldarrak Egiptotik bezala? ⁸ Horra, Jainko Jaunaren begiak erresuma bekatari honengan jarriak daude: lur gainetik desagerraraziko dut; hala ere, ez ditut erabat desagerraraziko Jakoben ondorengoak. ⁹ Bai, alea bahean astindu ohi den bezala, ale bat ere galdu gabe, halaxe astinaraziko dut Israel herria, nazio guztietan sakabanatuz. ¹⁰ Nire herriko bekatari guztiak ezpataz hilko dira, <Bai zera, ez da hurbilduko, zorigaitzak ez gaitu joko!> esaten zutenak, alegia.

Jaunak Daviden erreinua berregin

¹¹ «Egun hartan, jasoko dut Daviden etxola eroria, horma pitzatuak beteko dizkiot eta lurreratuak jasoko; antzinako eran berregingo dut. ¹² Eta israeldarrak berriro jabetu ahal izango dira Edom lurraldetik eta nireak izan diren nazio guztietatik geratzen denaz. Hala diot nik, hori guztia egingo duen Jaun honek».

¹³ Honela dio Jaunak: «Badatoz egunak: hazia erein orduko uzta biltzeko garaia izango da, mahatsa zapaldu orduko berriz biltzeko garaia izango da. Mendiek eta muinoek ardoa isuriko dute. ¹⁴ Nire herri Israelen zoria aldatuko dut: desegindako hiriak jasoko dituzte eta berorietan biziko dira, mahastiak jarriko dituzte eta berorien ardoa edango, baratzeak landatuko dituzte eta horietako fruituak jango. ¹⁵ Beren lurraldean landatuko ditut, eta nik eman lurretik ez dituzte inoiz aterako». Zure Jainko Jaunak esan du.